800/1. Машҳур тобеъин Абу Мулайҳ бир кишидан қилган ривоятларида «Мен Расулуллоҳ соллаллоҳу алайҳи васаллам ортларига мингашиб кетаётганимда, у зот миниб олган ҳайвонлари қоқилиб кетди. Шунда мен: «Шайтон бизни ночор ҳолатга солиб қўйди», дедим. Расулуллоҳ соллаллоҳу алайҳи васаллам: «Ундай деб айтма. Шундай десанг, у ўзини улуғ санаб, уйдек катталашиб, менинг қувватим билан бўлди, дейди. Лекин сен «Бисмиллаҳ», деб айт. Ана шундай десанг, пашша каби кичкина бўлади», дедилар. Абу Довуд ривоятлари.

801/2. Худди мана шу лафздаги ҳадисни ибн Сунний ривоятларида Абу Мулайҳ оталари Усомадан (р.а.) ривоят қилганлар. Мана шу икки ривоят ҳам саҳиҳдир. Чунки Абу Довуд ривоятларидаги номаълум шахс ҳам саҳобалардандир. Саҳобаларнинг барчалари адолатли, жаҳолат зарар бермайдиган шахслардир.