758/1. Абу Ҳурайрадан (р.а.) ривоят қилинади. Расулуллоҳ соллаллоҳу алайҳи васаллам: «Кимки бир мажлисда ўтирганида шовқин-сурон кўпайиб кетса, мажлисдан туришидан олдин
«Субҳанакаллоҳумма ва биҳамдика ашҳаду анла илаҳа илла анта астағфирука ва атубу илайка», деб айтса, ана шу мажлисда содир бўлган гуноҳлари кечирилади», дедилар. (Маъноси: «Аллоҳим, Сенга ҳамд айтиш ила Сени поклаб ёд этаман. Гувоҳлик бераманки, Сендан бошқа илоҳ йўқ. Сенга истиғфор айтиб тавба қиламан».) Термизий ривоятлари.
759/2. Абу Барзадан (р.а.) ривоят қилинади. Расулуллоҳ соллаллоҳу алайҳи васаллам ишни тугатиб, мажлисдан туришни хоҳласалар,
«Субҳанакаллоҳумма ва биҳамдика, ашҳаду анла илаҳа илла анта астағфирука ва атубу илайка», деб айтардилар. Шунда бир киши: «Эй Аллоҳнинг расули, сиз бир сўз айтдингиз, буни аввал айтмаган эдингиз», деганида, Расулуллоҳ соллаллоҳу алайҳи васаллам: «Мана шу калималар мажлисда бўлган нарсаларга каффоратдир», дедилар. Абу Довуд ривотлари.
Имом Ҳоким ҳам мана шу ҳадисни «Мустадрак» китобида Оиша (р.а.) ривоятидан саҳиҳ иснод ила ривоят қилганлар.
760/3. Алидан (р.а.) ривоят қилинади. Бу зот: «Кимки (Қиёмат кунида) тўлиқ ўлчов ила унга (савобни) ўлчанишини яхши кўрса, мажлиснинг охирида ёки ундан турган пайтда
«Субҳана роббика роббил иззати ъамма ясифувн ва саламун ъалал мурсалийн вал ҳамду лиллаҳи роббил оламийн», деб айтсин», дедилар. (Маъноси: «Қудрат эгаси бўлмиш Парвардигорингиз уларнинг сифатларидан (яъни, ҳар қандай айбу нуқсондан) покдир. (Барча) пайғамбарларга Аллоҳ томонидан салом бўлгай. Ҳамду сано барча оламларнинг Парвардигори - Аллоҳ учундир.) «Ҳулийятул авлиё» китобида ривоят қилинган.
|