726/1. Ибн Умардан (р.а.) ривоят қилинади. Расулуллоҳ соллаллоҳу алайҳи васаллам: «Аллоҳ азза ва жаллага исмларингизнинг энг маҳбуби Абдуллоҳ ва Абдураҳмондир», дедилар. Имом Муслим ривоятлари.

727/2. Жобирдан (р.а.) ривоят қилинади: «Биздан бир киши ўғил кўрганда, уни Қосим деб исмлади. «Сени Абулқосим, яъни Қосимнинг отаси, деб куняламаймиз, сенинг шаънинг улуғ эмас-ку», деганимизда, у киши Расулуллоҳга бунинг хабарини берди. Шунда Расулуллоҳ соллаллоҳу алайҳи васаллам: «Ўғлингни Абдураҳмон деб исмлагин», дедилар. Имом Бухорий ва Муслим ривоятлари.

728/3. Абу Вуҳайб Жушамийдан (р.а.) ривоят қилинади. Расулуллоҳ соллаллоҳу алайҳи васаллам: «(Фарзандларингизни) пайғамбарлар исмлари ила номланглар. Аллоҳ таолога исмларнинг маҳбуби Абдуллоҳ ва Абдураҳмондир. Энг содиқ исмлар Ҳорис (касб қилувчи) ва Ҳаммом (аҳамият берувчи), исмларнинг энг хунуги Ҳарб (уруш) ва Мурра (аччиқ)лардир», дедилар. Абу Довуд ва Насаийлар ривояти.