64. Жубайр ибн Мутъим розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Қариндошлик алоқасини узган одам жаннатга кирмайди», дедилар».

65. Абу Ҳурайра розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Раҳм Роҳмандан олинган. У: Эй Роббим! Менга зулм қилинди. Эй Роббим! Мен кесилдим. Эй Роббим! Мен… Мен… дейди.

«Сен кесганни кесишимдан, сенга силаи раҳм қилганга мен ҳам силаи раҳм қилишимдан рози бўласанми?» дейди У зот», дедилар».

66. Саъийд ибн Самъон розияллоҳу анҳудан ривоят қилинади:

«Абу Ҳурайранинг ёш болалар ва эси пастлар ишбоши бўлиб қолишидан паноҳ сўраганини эшитдим.

Саъийд ибн Самъон айтади:

«Менга Ибн Ҳасана Жуҳаний хабар берди. У Абу Ҳурайрага:

«Бунинг белгиси нима?» деган экан.

«Қариндошлик алоқаси узилиши, иғвогарга итоат қилиниши ва муршидга осийлик қилиниши», деди у».