1047. Шаҳр розияллоҳу анҳудан ривоят қилинади:

«Расулуллоҳ соллаллоҳу алайҳи васаллам масжиддан ўтдилар. У ерда бир тўп аёллар ўтирган эдилар. У зот уларга қўллари билан ишора қилиб салом бердилар. Сўнг:

«Эй аёллар! Валинеъматларингизга куфрони неъмат қилманглар! Валинеъматларингизга куфрони неъмат қилманглар!» дедилар.

Шунда аёллардан бири:

«Аллоҳнинг Ўзи сақласин! Ё Аллоҳнинг Набийси! Бу ҳам Аллоҳнинг неъматига ношукрликка ўхшайдими?» деди.

«Худди шундай. Бирингиз узоқ муддат эрсиз қолади. Эрли бўлганда эса , ғазаби келганда «Аллоҳга қасамки, ундан умрим бўйи ҳеч яхшилик кўрмадим» дейди. Мана шу Аллоҳнинг неъматига ношукрликдир. Мана шу валинеъматингизга куфрони неъматдир!» дедилар».

1048. Асмо ибнати Язийд Ансория розияллоҳу анҳодан ривоят қилинади:

«Ўзимга тенгдош қизлар билан ўтирган эдим олдимдан Набий соллаллоҳу алайҳи васаллам ўтдилар. У зот бизга салом бердилар ва:

«Валинеъматларга ношукрликдан эҳтиёт бўлинглар!» дедилар.

Мен уларнинг ичида У зотдан сўрашга энг журъатлиси эдим.

«Ё Аллоҳнинг Расули! Валинеъматларга ношукрлик нима?» дедим.

«Бирингиз ота-онасининг бағрида эрсиз ўтириши узаяди. Сўнг Аллоҳ уни эр ила ризқлантиради. Фарзанд ила ризқлантиради. Бас, жаҳл қилиб куфрони неъмат қилиб қўяди. «Сендан ҳеч яхшилик кўрмадим» дейди», дедилар».