888. Зуҳрий Балий қабиласилик бир кишидан қилган ривоятда айтилади:
«Расулуллоҳ соллаллоҳу алайҳи васалламнинг ҳузурларига отам билан бордим. У Зот отамга менга эшиттирмай бир нималар дедилар. Бас, отамга
«Сизга нима дедилар?» дедим.
«Қачон бир ишни қилмоқчи бўлсанг, шошилма. Токи Аллоҳ Таоло сенга ундан қандай чиқишнинг йўлини кўрсатмагунча ёки токи Аллоҳ сенга чиқишни раво кўрмагунча», деди».
889. Муҳаммад ибн Ҳанафия розияллоҳу анҳудан ривоят қилинади:
«Ўзи билан яшаши керак бўлган кишига яхшилик билан муомала қилмаган одамни ҳакийм деб бўлмайди. Ҳатто Аллоҳ Таоло унга бир кенглик ёки чиқиш йўли бергунча».
|