864. Убай ибн Каъб розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Баъзи шеърларда ҳикмат ҳам бўлади» дедилар».

865. Абдуллоҳ ибн Амр розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Шеър ҳам калом кабидир. Унинг яхшиси каломнинг яхшиси каби, ёмони каломнинг ёмони каби», дедилар».

866. Оиша розияллоҳу анҳодан ривоят қилинади:

«Шеърнинг яхшиси ҳам, ёмони ҳам бор. Яхшисини олгин, ёмонини қўйгин. Мен Каъб ибн Моликнинг шеъридан бир қанча шеърларни ривоят қилганман. Уларнинг ичида қирқ байтли бир қасида ҳам, ундан камроғи ҳам бор эди».

867. Миқдом ибн Шурайҳ розияллоҳу анҳу отасидан ривоят қилади:

«Мен Оишага:

«Расулуллоҳ соллаллоҳу алайҳи васаллам бирор шеърдан мисол келтирармидилар?» дедим.

«Абдуллоҳ ибн Равоҳанинг шеърларидан мисол келтирар эдилар:

«Сенга ўзинг билмаган хабарларни келтирур», деди».  

868. Асвад ибн Сарийъ розияллоҳу анҳудан ривоят қилинади:

«Мен шоир эдим. Бир куни Расулуллоҳ соллаллоҳу алайҳи васалламга:

«Ё Аллоҳнинг Расули! Мен Роббимни мадҳ этдим» дедим.

«Билиб қўй! Роббинг ҳамдни хуш кўради», дедилар.  Менга бундан бошқани зиёда қилмадилар».