453. Ҳабба ибн Холид ва Саваъ ибн Холид розияллоҳу анҳумодан ривоят қилинади:

«Икковлари Набий соллаллоҳу алайҳи васалламнинг олдиларига келсалар, у Зот ўзларининг деворларини тузатиб, биноларини яхшилаётган эканлар. Шунда икковлари У зотга ёрдам беришди».

454. Қайс ибн Абу Ҳозимдан ривоят қилинади:

«Хаббобни бетоб ётганида кўргани кирдик. У ярасини етти марта куйдирганди. Бас, у:

«Биздан аввал ўтган соҳибларимиз ўтишди. Улар учун дунё кам бўлмади. Биз тупроқдан бошқага арзимайдиган нарсани топдик.

Агар Набий соллаллоҳу алайҳи васаллам ўлим тилаб дуо қилишдан қайтармаганларида, мен уни тилаб дуо қилардим», деди».

455. «Кейин бир куни ҳузурига борсак, у девор уряпти ва: «Мусулмон қилган ҳар бир нафақасига савоб олади. Илло тупроққа аралаштиргани мустасно», деди».

456. Абдуллоҳ ибн Амр розияллоҳу анҳудан ривоят қилинади:

«Кулбамизни тузатаётсам Расулуллоҳ соллаллоҳу алайҳи васаллам ўтиб қолдилар ва:

«Бу нима?» - дедилар.

«Кулбамизни тузатаяпман. Эй Аллоҳнинг Расули!» дедим.

«Иш бундан кўра тезроқ», дедилар».