351. Абу Зарр Ғифорий розияллоҳу анҳудан ривоят қилинади:
«Расулуллоҳ соллаллоҳу алайҳи васалламдан:
«Эй Аллоҳнинг Расули! Киши бир қавмга муҳаббат қўйган, лекин уларга бориб қўшилишга қудрати етмайди?» дедим.
«Эй Абу Зарр! Сен ўзинг муҳаббат қўйган одамларинг билан биргасан!» дедилар.
«Мен Аллоҳга ва Аллоҳнинг Расулига муҳаббат қўйганман», дедим.
«Эй Абу Зарр! Сен кимга муҳаббат қўйган бўлсанг, ўшалар билан биргасан!» дедилар».
352. Анас ибн Молик розияллоҳу анҳудан ривоят қилинади:
«Бир киши Расулуллоҳ соллаллоҳу алайҳи васалламдан:
«Эй Аллоҳнинг Набийси! Қиёмат қачон?» деб сўради.
«Сен унга нима тайёрладинг?» дедилар.
«Мен катта нарса тайёрлаганим йўқ. Фақат Аллоҳга ва Унинг Расулига муҳаббатим қўйганман, холос», деди.
«Киши муҳаббат қўйгани билан бирга», дедилар».
Анас: «Мусулмонларнинг Исломдан кейин ўша кунидагидек шодон бўлганларини кўрмадим», деди».
|