Абу Исҳоқ айтади: “Бизга Баро ибн Озиб розияллоҳу анҳу сифатлаб берди. Икки қўлини қўйди ва икки тиззасига суянди. Думбасини кўтарди ва: “Расулуллоҳ соллаллоҳу алайҳи васаллам худди шундай сажда қилардилар”, деди.
Анас розияллоҳу анҳудан ривоят қилинади: “Набий соллаллоҳу алайҳи васаллам: “Саждада тўғри бўлинглар, бирингиз тирсакларини ит тўшашидек тўшамасин”, дедилар.
Маймуна розияллоҳу анҳодан ривоят қилинади: “Албатта, Набий соллаллоҳу алайҳи васаллам қачон сажда қилсалар, икки қўллари орасини ғовак қилардилар. Ҳатто агар бир қўзичоқ икки қўллари остидан ўтмоқчи бўлса, ўта оларди”.
Ибн Аббос розияллоҳу анҳумо айтади: «Набий соллаллоҳу алайҳи васалламнинг ортларидан бордим. У зотнинг саждага эгилган ҳолларида қўлтиқлари оқини кўрдим. У зот батаҳқиқ икки қўллари орасини очиқ тутардилар».
Расулуллоҳ соллаллоҳу алайҳи васалламнинг саҳобаси Аҳмар ибн Жазъ розияллоҳу анҳудан ривоят қилинади: “Расулуллоҳ соллаллоҳу алайҳи васаллам қачон сажда қилсалар билакларини биқинларидан очиқ тутар, ҳатто у зотга раҳмимиз келарди”.
Абу Ҳурайра розияллоҳу анҳудан ривоят қилинади: “Набий соллаллоҳу алайҳи васаллам: “Қачон бирингиз сажда қилса икки қўлини ит тўшашидек тўшамасин, икки сонини йиғиб олсин”, дедилар”.
|