Абу Ҳурайрадан ривоят қилинади: “Албатта, Расулуллоҳ соллаллоҳу алайҳи васалламдан битта кийимда намоз (ўқиш) тўғрисида сўралди. Набий соллаллоҳу алайҳи васаллам: “Ёки сизларнинг ҳар бирингизда иккитадан кийим борми?” дедилар”.
Абу Ҳурайрадан ривоят қилинади. У шундай деди: “Расулуллоҳ соллаллоҳу алайҳи васаллам шундай дедилар: “Сизлардан бирортангиз елкасида у (мато) дан бирор нарса бўлмай туриб битта матода намоз ўқимасин”.
Абу Ҳурайрадан ривоят қилинади. У шундай деди: “Расулуллоҳ соллаллоҳу алайҳи васаллам шундай дедилар: “Агар сизлардан бирингиз бир матода намоз ўқиса, икки елкасига икки тарафини ажратиб қўйсин”.
Умар ибн Абу Саламадан ривоят қилинади. У шундай деди: “Расулуллоҳ соллаллоҳу алайҳи васалламнинг бир кийимда, унинг икки тарафи ажраган икки елкаларига ёпилган ҳолда намоз ўқиётганларини кўрдим”.
Қайс ибн Толқ отасидан ривоят қилади. У шундай деди: “Набий соллаллоҳу алайҳи васалламнинг олдиларига бордик. У киши келиб: “Эй Аллоҳнинг Набийси, битта матодаги намозни нима дейсиз?” деди. У (ровий) шундай деди: “Расулуллоҳ соллаллоҳу алайҳи васаллам изорларини ечиб, у билан ридоларини ўрадилар. У иккиси ила (бўй-бастлари) ўралди. Сўнгра Аллоҳнинг Набийси соллаллоҳу алайҳи васаллам туриб, биз билан намоз ўқидилар. Қачонки намозни адо қилгач: “Сизларнинг ҳар бирингиз иккита мато топа оладими?!” дедилар”.
|