Оиша розияллоҳу анҳодан ривоят қилинади:
«Пайғамбар соллаллоҳу алайҳи васаллам:
«Бамдоднинг икки ракъати дунё ва ундаги нарсалардан яхшидир», дедилар».
Муслим, Аҳмад, Термизий ва Абу Довуд ривоят қилган.
Аҳмад:
«Агар сизни отлиқлар қувиб турса ҳам иккисини қўйманглар»ни зиёда қилган».

Яна ўша кишидан ривоят қилинади:
«Пайғамбар соллаллоҳу алайҳи васаллам нафллардан ҳеч бирига Бамдоднинг икки ракъатига аҳд қилганларидек шиддатли аҳд қилмаган эдилар».
Уччовлари ривоят қилишган.

Яна ўша кишидан ривоят қилинади:
«Пайғамбар соллаллоҳу алайҳи васаллам Бамдод намозидан олдинги икки ракъатни енгил ўқир эдилар. Ҳаттоки, мен, «Уммул китоб»ни ўқидиларми?» деб ўйлардим».

Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам Бамдоднинг икки ракъатида «Қул яаа аююҳал кафируун» ва «Қул ҳуваллоҳу аҳад»ни ўқирдилар».
Муслим, Абу Довуд, Термизий, Насаий ривоят қилган.