Кийим, пойабзал, иштон ва шунга ўхшаш енгли, почали либосларни ўнг томонидан кийиб, чап томонидан ечиш мус-таҳабдир. Шу сингари, сурма қўйиш, мисвок ишлатиш, тирноқ олиш, мўйловни қисқартириш, қўлтиқ тукини юлиш, соч олиш, намоздан салом билан чиқиш, масжидга кириш, ҳожатхонадан чиқиш, таҳорат олиш, ғусл қилиш, таом ейиш, ичимлик ичиш, қўл бериб сўрашиш, Ҳажарул асвадни ушлаш, бировдан нарса олиш ҳамда бериш ва шунга ўхшаш ишлар ўнг томон билан бошланади.

39/1. Оиша (р.а.) ривоят қиладилар: «Расулуллоҳ алайҳиссалом ҳар бир нарсани ўнг тарафдан бошлашни ёқтирар эдилар. Ҳатто, покланиш ва соч тарашда ҳам». Бухорий ва Муслим ривоятлари

40/2. Яна Оиша (р.а.) онамиз айтадилар: «Расулуллоҳ соллаллоҳу алайҳи васалламнинг ўнг қўллари покланиш ва таом учун, чап қўллари эса, хало ҳожати ва бошқа нохуш нарсалар учун эди». Абу Довуд ривоятлари

41/3. Ҳафса (р.а.) онамиз хабар қилишларича, Расулуллоҳ соллаллоҳу алайҳи васалламнинг ўнг қўллари таом, ичимлик ва кийим кийиш, чап қўллари булардан бошқа ишлар учун бўлган. Абу Довуд ва Байҳақий ривоятлари

42/4. Абу Ҳурайрадан (р.а.) ривоят қилинади. Расулуллоҳ соллаллоҳу алайҳи васаллам: «Агар либос кийсангиз ёки таҳорат қилсангиз, ўнг томонингиздан бошланглар», деб айтдилар. Абу Довуд, Термизий, Ибн Можа, Байҳақий ривоятлари