658. Абу Ҳурайра розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Ким Аллоҳдан сўрамаса, Аллоҳ унга ғазаб қилади», дедилар».

659. Анас розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Аллоҳга дуо қилсангиз, дуода азму қарорли бўлинг. Бирингиз зинҳор, ҳоҳласанг бергин, демасин. Чунки Аллоҳни мажбурловчи йўқ», дедилар».

660. Абон ибн Усмондан ривоят қилинади:

«Мен Усмоннинг «Расулуллоҳ соллаллоҳу алайҳи васалламнинг «Ким ҳар куни эрталаб, ҳар кечаси кечқурун уч марта «Исми билан ерда ҳам, осмонда ҳам ҳеч нарса зарар етказа олмайдиган, ўта эшитгувчи ва ўта билувчи Аллоҳнинг исми билан» деса, унга ҳеч нарса зарар қила олмайди» деганларини эшитдим», деганини эшитдим».

Унга фалажнинг бир тури етган эди. Унга назар сола бошлади. У буни фаҳмлади ва «Ҳадис сенга айтганимдек. Лекин ўша куни мен уни айтмапман. Аллоҳнинг қадари ўтиши учун», - деди».